Letste nejs

En dan bèsse bezig met ’t make van zo’n veursjtelling en dan kump auch van versjillende kankte wer de vraog,
geise ouch nog ‘nne kier un gedichtebökske make?
Jao, en ierlik gezag is dit dan ouch wel ’n sjoeën gelegenheid öm det dan te doon.

Deze kieër bèn ich as ech Dörper maedje ouch de oetdaging aangegaon öm mien gedichjes zoeveul meugelik in ’t ech Heljes dialek te sjrieve. En dan waas dao ouch wer die vraog, wèlke foto en wèlke titel krieg deze bundel?
De sjpecht heet vör mich ’n hieële biezongere beteikenis … de foto oppe veurkank van dit bökske is van ’n sjilderej wat ’n hiele leeve vriendin vör mich heet gemak.
In ’t laeve bèsse eigelik stieëds op zeuk en in mien zestig laevesjaore heb ich hieël get oetgevogeld.
En wat bèn ich dan blej det ós Angelique zónne creatieve doezjendpoeët is … die heet oooooore en nachte lank aan dit bökske zitte te sjoestere … mer ’t resultaat moog der zien … al zèk ich ’t zellef!

In deze bundel vingt gae ouch deze kieër wer de lach en de traon van alles wasse in ’t laeve zoeë al tege kums.
Wilt gae de bundel kaupe, det kin! Vanaaf 19 september is “Oetgevogeld” te koup vör 10 euro.